اقوام متحدہ کے تعاون سے ضلع کرم کے لیے امدادی سامان روانہ

 این ڈی ایم اے پاکستان نے اقوام متحدہ کے اداروں کے تعاون سے ضلع کرم کے لیے امدادی سامان روانہ کیا ہے۔ یہ امدادی سامان 11 ٹرکوں پر مشتمل ایک قافلے کے ذریعے روانہ کیا گیا، جو اقوام متحدہ کی ایجنسیوں بشمول یونیسیف، یو این ایچ سی آر اور آئی او ایم کی طرف سے فراہم کیا گیا ہے۔ امدادی سامان میں حفظان صحت اور خواتین کے لیے ضروری سامان پر مشتمل کٹس، ایمرجنسی کٹس، کچن سیٹ، کمبل، بستر، جیری کین اور ترپال شامل ہیں۔ ان امدادی اشیاء کی تقسیم پاک فوج، سول انتظامیہ اور اقوام متحدہ کے اداروں کے نمائندگان کی جانب سے مشترکہ طور پر کی جائے گی۔