پشاور: قیوم اسپورٹس کمپلیکس میں 35 ویں نیشنل گیمز کی اولمپک ٹارچ ریلی کے سلسلے میں ایک شاندار اور پروقار تقریب منعقد ہوئی، جس میں صوبائی مشیر برائے کھیل و امورِ نوجوانان تاج محمد خان ترند نے شرکت کی اور مشعل باضابطہ طور پر آزاد جموں و کشمیر کے نمائندوں کے حوالے کی۔
تقریب کے دوران خیبرپختونخوا اولمپک ایسوسی ایشن کے جنرل سیکرٹری ذوالفقار بٹ اولمپک مشعل اٹھائے اسٹیج پر پہنچے، جہاں انہوں نے سابق صوبائی وزیر کھیل سید عاقل شاہ، صدر ہارون ظفر اور دیگر اہم شخصیات کے ہمراہ مشعل مشیر کھیل تاج محمد ترند کے سپرد کی۔
تقریب سے خطاب میں بتایا گیا کہ مشعل کا یہ تاریخی سفر آزاد جموں و کشمیر سے مختلف شہروں سے ہوتا ہوا نیشنل گیمز کے آغاز تک جاری رہے گا، اور آخر میں میزبان شہر کراچی میں اس کا اختتام ہوگا۔
اس موقع پر یہ بھی اعلان کیا گیا کہ خیبرپختونخوا کا 480 کھلاڑیوں اور آفیشلز پر مشتمل بڑا دستہ 6 دسمبر سے کراچی میں ہونے والے 35 ویں نیشنل گیمز میں بھرپور انداز سے حصہ لے گا، جہاں صوبہ مختلف کھیلوں میں اپنی نمائندگی کرے گا۔
